部腦彎咗

孻細佬清早幫小禺維修，所以用得番！

星期二、四是小禺最閒的日子，諗住畫畫，但部腦就係呢兩日“彎”咗…

無得用電腦畫圖，小禺唯有畫吓手繪(好耐無揸筆啦~)、抹吓廚房、同埋整嘢食。

星期二晚整合桃蛋糕，星期四一早就整咗砵仔糕、蜜紅豆粒、紅豆餡(整定遲d用)，仲有煮茶葉蛋。

因為DOWN2今日生日，佢又唔想食蛋糕添肥，所以簡簡單單，半夜定整茶葉蛋朝早食，今晚打算食扒餐，或者上海菜。樓下間上海菜館租約期滿，月中結業，佢整得幾好，新鮮熱辣又足料，好想幫襯多次，今晚星期五只怕無位。星期三晚先知要結業，又未決定邊度食生日飯，所以無預早訂枱，佢得10枱8枱，小店又少間。

。。。。。。。。。。。。。。。。。。。

星期三小禺去深水埗(返教會)，喺超巿買馬蹄粉整砵仔糕，發覺得番盒，個膠套仲穿咗！…最終都買咗。紙盒內的馬蹄粉只係用紙包住…希望唔好生蟲啦，諗落$39.9/500克好貴吓？(既然買咗就唔好諗咁多啦)

剛才再整砵仔糕，不錯呢~~ (難得較滿意)，但水份不小心加多了，希望下次成功了再post食譜。

禺爸禺媽要出門同人飲茶，小禺趁佢哋未走，拿拿聲俾佢哋試 (好熱呢~)

禺媽媽都話好味！

得番3件，就留俾DOWN2、孻細佬和亞船今晚做飯後甜品~~ (用完保鮮紙，暫時用保鮮袋入住)


↓中間2件趁熱"不"俾阿爸阿媽，個模無掃油，所以有些黏，凍咗較容易除。

今次用鬆餅模，因為較易控制擺位；以前小禺都係用砵仔糕那種碗的，整出來會靚D~~